GURITAN JAMPI PUYANG
(SYAIR : TUAN GURU FIKRI AL MUSLIM/ KANG FEKRI JULIANSYAH)
Iluk pule pangkal guritan
Alangkah ringkih pangkal pantunan
Ini die ganjur guritan
Jampi Kampuh Pepuyangan
Terangkai dalam ucapan
Tecatat dalam fikiran
Tehimpun njadi Ubat Uluan
Sebagiannye kah kutuhunkan………
Ini die Jampi Kampuh Pepuyangan
Empuk dikit mangke keruan
Asak Tetekut nga Tekedan
Ucapan ini kandik Pakaian
Tulung siapkah garam nga cabi
Ini jampian mangke njadi
Sambil dimakan bacekah lah tini
Ini Ilmu Jeme Bahi…………
Ini die Ganjur Guritan
Bukan sembarang ini tulisan
Mangkenye jangah di memainkah
Pacak kite kene Tulah
Itu kate Puyang Ramidiah
Nga Puyang Biduriah
Ade jampian kandik Tiduk
Ade pule Jampi Semenguk
Ade jampi Buang Tuju
Ade pule kandik Betemu
Jampi pekasih kandik Remaje
Ade pule Buang Perbule
Bulan Mahram Jampinye Kute
Jampi Peneras mangke perkase
Ini jampian disebut Mantera
Ku dapat waktu kuliah
Ade pule waktu SMA
San di Puyang-puyang di Besemah
Jampian kanye Pusik’an
Ucapan kanye Pemunian
Itu pesan Puyang Tengah Laman
Kandik nulung jeme Kempenan
Atau kene Ketinggungan
Ini die Ganjur Guritan
Kalu ade ye Kene Kempenan
Bacekah lah ini untaian
Nggah yakin lah kepade Tuhan
Kusuk-kusuk daun buluh
Kusuk-kusuk daun kunyit
Saye dikusuk saye luluh
Saye dikusuk saye lengit
Ini Guritan masih dibabar
Ini damenye Ucap Pendikar
Kalu musuh kite nak datang
Ini ucapan bukan sembarang
Tunjukku sekunang-kunang
Saye ditunjuk saye memerayang
Aku belindung kepade Junjungan
Tuhan kite sekalian
Ade agi kandik kampuh bebujangan
Mangke si anu tekenang-kenang
tehingat siang ataupun malam
Ini bedame Kucur Kebau Jalang
Ini die sekilas ucapan
Aku ngecakkah garam
Kandik nangkap kebau jalang
Kandik nangkap kumbang belih
Kandik nangkap gajah gile
Kebau jalang lagi kah dapat
Kumbang belih lagi kah dapat
Gajah gile lagi kah dapat
Manekah pule ati si anu itu
Bedegup kene di jantung
Bedegup kene di ati
Remuyanglah ati si anu itu
Endiw-endiw entah nian titu !
Ini die Ganjur Guritan
Kandik nulung jeme Ketinggungan
Bismillah Wahai Junjungan
Kami beselindung hanye kepade Tuhan
Bukan beselindung kepade Malam
Bukan pule kepade Siang
Bukan pule kepade kamu ye datang
Kami beselindung kepade Tuhan
Tuhan seru sekalian alam
Iluk pule akhir pantunan
Iluk pule ini ucapan
Jangah takut kurang sebase
Ini Guritan Base Semende
Ini Jampi Puyang Wahab Marsindang
Kandik sedakde anak cucung Puyang
Mangke banyak jeme ye Ribang
Ini ucapan jangah dibuang
Bismillahirrohmanirrohim
Tunduklah ati si anu itu kepadeku
Berkat kalimah Laila Hailallah
Muhammaddarrasulullah
Guritan masih diganjurkah
Ini die kandik diamalkah
Laila Ha Ilallah
Tiade Tuhan selain ALLAH
Asal Mule manusie san di Tanah
Tunduk sekalian jeme ye marah
Tawar Kate Allah !
Guritan lah di ujung
Lain waktu kite sambung
Kalu ade ye mintak tulung
Jangah lupe bawang tige siung !
